Zbulim revolucionar për makinat me benzinë dhe naftë

Industria e automjeteve me motorë me djegie të brendshme po përballet me një ndryshim shumë të madh. Këtë e pohojnë studiues nga Universiteti Aalto dhe Universiteti i Turut (Åbo) në Finlandë.

Sipas tyre, është arritur një zbulim i rëndësishëm që mund të ndryshojë rrënjësisht teknologjinë e motorëve me benzinë dhe naftë. Studiuesit kanë zhvilluar një motor të ri, i cili mund të eliminojë plotësisht emetimet e oksideve të azotit nga motorët me djegie të brendshme.

Ideja kryesore e këtij motori është që ajri i zakonshëm, i cili përbëhet nga azoti dhe oksigjeni, të mos përdoret më në procesin e djegies. Në vend të tij, përdoret një përzierje e gazit fisnik argon dhe oksigjenit.

Sipas Ville Vuorinen, docent i inxhinierisë energjetike në Universitetin Aalto, kjo metodë mund të jetë vërtet revolucionare. Ai shpjegon se vetitë e veçanta termodinamike të argonit ndryshojnë në thelb mënyrën se si ndodh djegia në motor.

Motori i ri nuk prodhon aspak okside azoti, sepse argoni nuk përmban azot. Kjo do të thotë se një nga ndotësit më të dëmshëm të ajrit eliminohet plotësisht. Vuorinen thekson gjithashtu se, nëse si karburant përdoret hidrogjeni i gjelbër, motori mund të funksionojë pa asnjë emetim të dioksidit të karbonit.

Transporti, burimi kryesor i ndotjes

Aktualisht, sektori i transportit është përgjegjës për 81% të emetimeve të oksideve të azotit. Këto gaze janë shumë të dëmshme për shëndetin e njeriut, veçanërisht për sistemin e frymëmarrjes, dhe kontribuojnë në ndotjen e mjedisit, përfshirë acidifikimin dhe mbingarkimin ushqyes të pyjeve, tokës dhe ujërave.

Më pak karburant, më shumë efekt

Përveç përfitimeve mjedisore, motori i ri ofron edhe avantazhe teknike. Studiuesit thonë se konsumi i karburantit pritet të ulet, ndërsa fuqia e motorit nuk do të reduktohet. Motorët tradicionalë me benzinë dhe naftë shfrytëzojnë zakonisht vetëm rreth 30% të energjisë së karburantit. Ndërsa motori me cikël argoni mund të arrijë një rendiment shumë më të lartë, deri në 70–80%.

Për të studiuar më mirë procesin e djegies, grupi i studiuesve ka përdorur një motor optik, i cili lejon vëzhgimin e drejtpërdrejtë të asaj që ndodh brenda motorit gjatë djegies.

Sipas Vuorinen, ky është një hap i rëndësishëm shkencor. Ai thotë se, për aq sa dihet, ky është grupi i parë kërkimor në botë që ka arritur të vëzhgojë drejtpërdrejt procesin e djegies së hidrogjenit, argonit dhe oksigjenit në një motor optik. Matjet e kryera kanë konfirmuar parashikimet teorike të studiuesve dhe tregojnë qartë se ky koncept është teknikisht i realizueshëm.